schlesische Gedichte - Derr Groabs`n ihr Häusel

Derr Groabs`n ihr Häusel

Is hoot schunt tagelang geschneit.
Der Schnie lait dick, dar Schnie lait weit.

Ma koan nich mieh ei olle Ecka
sugoar die Eisaboahn blieb stecka,
derr Schnieflug fährt eim Dorfe nunder,
Is doas a Wunder?

Doas kleene Haus der Groabs`-Marie,
doas steckt gur siehr eim hucha Schnie.
Ma sitt erscht keene Türe.
Die Fansterla, die viere,
die hoot derr Wind gutt eigepackt.
Doas ganze Häusla is versackt.

Zum Friehjuhr, wenn die Sunne kimmt,
bestimmt doas Durf eim Wosser schwimmt.
Poßt uf, derr Schnie werd Montsche,
na, doas gibt a Gepontsche!
Doas Wosser stieht eim ganza Urt,
dann schwimmt doas schiene Häusla furt,
ju, üm doas Häusla ies geschahn -
ihr werd`s ju sahn!

Doch wenn doas Häusla nich zerrgieht,
wenn`s uf semm Plotze feste stieht,
wenn`s nich zerrweecht und standhoaft bleit,
nee, wie sich doa die Groabs`n freit.
Doa lacht dann die Marie:
Ock furt, du bieser Schnie!